Post


രണഗന്ധം ഏതാണ് ?
ചന്ദനത്തിരിയുടെ
വശ്യസുഗന്ധമാണോ?
ഉണക്കവരളികളുടെ
ചാണകഗന്ധമാണോ?
പഴയ രാമച്ചത്തിന്റെ 
തണുത്തമണമാണോ?
കര്‍പ്പൂരക്കട്ടയുടെ
രൂക്ഷഗന്ധമാണോ?
എള്ളെണ്ണത്തിരിയുടെ
കരിന്തിരിമണമാണോ?

പച്ചമാവിന്‍ കൊമ്പുകള്‍
ശ്വാസംമുട്ടികത്തുന്ന 
വെളുത്തുചുരുണ്ട പുക 
നെയ്പ്പാടയുടെയിടയിലൂടെ
ഊളിയിട്ടുയരുമ്പോഴുള്ള
കണ്ണെരിച്ചിലാണോ?

കോടിക്കോടിക്കോശങ്ങള്‍ 
നിലയ്ക്കാതെ കൊഴിയുന്ന
വാനപ്രസ്ഥകാലത്തെ
വൃദ്ധച്ചൊരുക്കാണോ?

എണ്ണപ്പെടുന്ന നാളുകള്‍
മലവെള്ളപ്പാച്ചിലില്‍
ഒലിച്ചകലുമ്പോഴുള്ള
നിസ്സഹായതയുടെ
നിശ്വാസഗന്ധമാണോ?

വീടുകൂടും നാടുസ്വത്തും
മക്കളും പേരക്കിടാങ്ങളും
ഒന്നുംവേണ്ടെനിക്ക്-
അതിജീവിക്കാനൊരു 
ചകിരിത്തുമ്പെങ്കിലുംതരൂ-
വെള്ളവും ചോറും വേണ്ട
ഈ ഉണ്മ മാത്രം മതി-
ദൈവമേ... ദൈവമേ...
മരിക്കാതിരുന്നെങ്കിലെന്ന ;
നേരിന്‍തിരിച്ചറിവിന്റെ
വളരെ വൈകിപ്പോയ 
വിലാപഗന്ധമാണോ?

അതോ,
ഈ ആസന്നമരണന്‍
ഞാനല്ലല്ലോയെന്ന
'അടിച്ചുപൊളി'ക്കാരായ
ബന്ധുമിത്രാദികളുടെ
യുവത്വാഹ്ലാദത്തിന്റെ
നിഗൂഢാനന്ദത്തിന്റെ
പിതൃനിന്ദയുടെ
കെട്ട വാടയാണോ?

© 8448 ■ ıɹǝuuɐʞʞɐɯ ■





Facebook Comments Bloggerised by Author GANGA DHARAN MAKKANNERI

4 Responses so far.

Leave a Reply

Related Posts Plugin for WordPress, Blogger...